११ महिनामा १३ खर्बको बस्तु आयात हुँदा निर्यात ८७ अर्बमा सिमित, १७ प्रतिशतले बढ्यो व्यापारघाटा

काठमाडौं । आर्थिक बर्ष २०७५/७६ को ११ महिनामा करिव १३ खर्ब बराबरको बस्तु आयात भएको छ । नेपाल राष्ट्र बैंकले सार्वजनिक गरेको तथ्याङ्क अनुसार गत आर्थिक बर्षको ११ महिनामा विभिन्न देशहरुबाट १२ खर्ब ९९ अर्ब ८० करोड बराबरको बस्तु आयात भएको हो ।

सरकारले आयात प्रतिस्थापनका विभिन्न नीति तथा नियमहरु ल्याएपनि सोही अनुसार आयात भने घट्न सकेको छैन । पछिल्लो समय आयात उच्च हुँदै गएको तथ्याङ्कले देखाएको छ । विदेशबाट हुने आयात ११ महिनामा १७ दशमलव ३ प्रतिशतको वृद्धि भएको छ ।

तर, सरकारले निर्यातमा अनुदान तथा विभिन्न प्रकारका सुविधा दिँदा पनि नेपालबाट निर्यात हुने बस्तुको अनुपातमा समेत भनेजस्तो सुधार आउन नसकेको तथ्याङ्कले देखाएको छ । तथ्याङक अनुसार गत आबको पछिल्लो ११ महिनामा ८७ अर्ब ८३ करोड रुपैयाँ बराबरको बस्तु निर्यात भएको छ । जुन अघिल्लो आबको सोही अवधिको तुलनामा १८ दशमलव ७ प्रतिशतले मात्रै बढि हो ।

समग्रमा नेपालतर्फको आयात उच्च र निर्यातमा गिरावटका कारण व्यापारघाटा बढेर १२ खर्ब ११ अर्ब ९६ करोड पुगेको छ । विदेशबाट बढी आयात हुने बस्तुमा पेट्रोलियम पदार्थ, हवाईजहाजका सामग्री, तयारी पोशाक, एमएस बिलेट लगायतका सामग्री छन ।

यसैगरी निर्यात हुने बस्तुमा भने पोलिस्टर यार्न, जुटका सामान, चाउचाउ, दाल लगायतका बस्तु रहेका छन ।


फेसबूक कमेन्ट गर्नुहोस्

DMCA.com Protection Status