काठमाडौं । नेपाल चेम्बर अफ कमर्शका उपाध्यक्ष दीपक मल्होत्राले व्यवसायी आर्थिक संकटमा परेको भन्दै सरकारले प्याकेजको घोषणा गर्न ढिला गर्न नहुने बताएका छन ।
उनले कोभिड १९ (कोरोना भाईरस) ले संकट निम्त्याएको भन्दै बिभिन्न बस्तुमा सहुलियत दिन नेपाल चेम्बर अफ कमर्शले सरकारसँग माग गरेको जानकारी दिएका हुन । ‘व्यवसायी यो संकटको अवस्थामा राष्ट्र तथा जनतालाई सहयोग गर्न तयार छन, विभिन्न प्याकेज पनि घोषणा गर्न चाहन्छन,’ मल्होत्राले भने, ‘सरकारले पनि व्यवसायीको समस्या समाधान गर्ने घोषणा गर्नुपर्छ ।’
चेम्बरले अल्पकालीन र दीर्घकालीन प्याकेजको व्यवस्था गर्नुपर्ने, सीमावर्ती भन्सारमा आएका तथा आउने माल वस्तुको डेमरेज, डिटेन्सन चार्जमा पूर्णतः छुट हुनुपर्ने, भुक्तानी भएको कारोबारमा मात्र मूल्य अभिवृद्धि कर लिने व्यवस्था हुनुपर्ने माग सरकारसँग राखेको छ ।
त्यस्तै सरकारसँग बैंकहरुले ऋणको भुक्तानीको अवधि रिसेड्युल गर्नु पर्ने, बैंक तथा वित्तीय संस्थाबाट लिएको कर्जाको व्याजदरमा कम्तीमा ५ प्रतिशत सरकारी अनुदान, २ प्रतिशत बैंकबाट सहुलियतको व्यवस्था हुनु पर्ने चेम्बरले माग गरेको छ ।
