सरकारले यसअघि बर्खास्त गरिएका दूरसञ्चार प्राधिकरणका अध्यक्ष दिगम्बर झालाई पुनः सोही पदमा नियुक्त गरेको छ । बिहिबार बसेको मन्त्रीपरिषद बैठकले उक्त निर्णय गरेको हो ।
यसअघि सञ्चार तथा सुचना प्रविध मन्त्रालयले विना प्रतिस्पर्धा नै झाको नाम प्रस्ताव गरेको खबर बाहिर आएपछि खुला प्रतिस्पर्धाको आह्वान गरेको थियो । उक्त प्रतिस्पर्धामा १५ जनाले आवेदन दिएका थिए । अन्तर्वार्ता र विना प्रस्तुति केवल आवेदनका आधारमा मात्रै मन्त्रालयले गठन गरेको छनोट समितिले दिगम्बर झा, सुशिल घिमिरे र पुरुषोत्तम खनालको नाम मन्त्रीपरिषदमा सिफारिस गरेको थियो ।
यसअघि गत सोमबार बसेको मन्त्रीपरिषद बैठकमा सञ्चार तथा सुचना प्रविधि मन्त्री गोकुल बास्कोटाले झालाई बनाउनुपर्नेमा जोड दिएपनि मन्त्रीहरुले असन्तुष्टि जनाएपछि यसमा टुङ्गो लाग्न सकेको थिए । त्यस लगत्तै मन्त्री बास्कोटा इथियोपियामा आयोजना भइरहेको प्रविधि सम्बन्धि एक कार्यक्रमका लागि त्यता प्रस्थान गरेका थिए ।
पहिलोपटक विसं २०६९ मा अध्यक्ष नियुक्त भएका झा विरुद्ध अदालतमा मुद्धा दायर पछि प्राधिकरण अध्यक्ष विहिन हुन पुगेको थियो । मेकानिकल इन्जिनियरलाई दूरसञ्चार क्षेत्रको जिम्मेवारी दिन नहुने भन्दै मुद्धा दायर भएको थियो । उक्त मुद्धामा दुई वर्षपछि झाको पक्षमा अन्तरिम आदेश आएपछि उनले नै प्राधिकरणको जिम्मेवारी बहन गर्दै आएका थिए ।
गत वर्ष पाँच वर्षे कार्यकाल समाप्त भएपनि शेरबहादुर देउवा सरकारले उनैलाई निरन्तरता दिने निर्णय गरेको थियो । पछि केपी शर्मा ओली सरकारले निर्वाचन आचारसंहिता लागु भएपछि देउवा सरकारले गरेका सबै नियुक्ति खारेजी गर्ने निर्णय गरेपछि झा पनि बर्खास्तीमा परेका थिए । ओली सरकारको उक्त निर्णय विरुद्ध झा सर्र्वोच्च अदालत गएपछि उनले पुनः अन्तरिम आदेश पाएका थिए । तर, पछि आश्चर्यजनक रुपमा उनले आफ्नो मुद्धा फिर्ता लिएको घोषणा गरे ।
सञ्चार मन्त्रालयले पुनः नियुक्त गर्ने आश्वासन दिएपछि उनले मुद्धा फिर्ता लिएको स्रोतले जनायो । मन्त्रीपरिषदको निर्णय बाहिर सार्वजनिक नगरिएपनि झालाई नै नियुक्त गरिएको एक मन्त्रीले बिजखबरलाई बताए ।
