काठमाडौं । चालू आर्थिक बर्षको पहिलो १० महिनामा आयात ३४ दशमलव ९ प्रतिशतले बढ्दा निर्यात ९ दशमलव ८ प्रतिशतले बढ्न पुगेको छ ।
सो अबधिमा ८ खर्ब ८ अर्ब रुपैयाँको आयात हुँदा कुल निर्यात ६१ अर्ब २ करोड रुपैयाँको मात्र निर्यात भएको छ । समीक्षा अवधिमा भारततर्फ १५ प्रतिशत, चीनतर्फ ५ दशमलव ६ प्रतिशत र अन्य मुलुकतर्फ ३ दशमलव १ प्रतिशतले निर्यात बढेको छ । वस्तुगत आधारमा जुस, पिना, जुटका समान, जीआई पाईप, चाउचाउ लगायतका वस्तुको निर्यात बढेको छ भने उनी गलंैचा, तयारी पोशाक, अलँैची, पोलिष्टर धागो, चिया लगायतका वस्तुहरुको निर्यात घटेको छ ।
समीक्षा अवधिमा कुल वस्तु आयात ३४ दशमलव ९ प्रतिशतले बढेको छ । तर, अघिल्लो वर्षको सोही अवधिमा यस्तो आयात ४ दशमलव ६ प्रतिशतले घटेको थियो । समीक्षा अबधिमा भारतबाट भएको आयात ४३ दशमलव ७ प्रतिशत, चीनबाट भएको आयात १२ दशमलव ५ प्रतिशत र अन्य मुलुकबाट भएको आयात २६ दशमलब ९ प्रतिशतले बढेको छ ।
वस्तुगत आधारमा पेट्रोलियम पदार्थ, यातायातका साधन तथा पार्टपूर्जा, एमएस बिलेट, हवाईजहाजका पार्टपुर्जा, अन्य मेशिनरी तथा पार्टपुर्जा लगायतका वस्तुको आयात बढेको छ । तर सो अबधिमा रासायनिक मल, औषधि, कोल्डरोल सीट ईन क्वाईल, ड्राईसेल ब्याट्री, सुपारी लगायतका वस्तुहरुको आयात घटेको छ ।
१० महिनाको अवधिमा कुल वस्तु व्यापार घाटा ३७ दशमलव ५ प्रतिशत अर्थात ७ खर्ब ४७ अर्ब ६५ करोड पुगेको छ । अघिल्लो वर्षको सोही अवधिमा यस्तो व्यापार घाटा २ दशमलव ४ प्रतिशतले घटेको थियो । समीक्षा अवधिमा निर्यात–आयात अनुपात ७ दशमलब ५ प्रतिशत रहेको छ । अघिल्लो वर्षको सोही अवधिमा यस्तो अनुपात ९ दशमलव ३ प्रतिशत रहेको थियो ।
