काठमाडौं । बिहीबार बेलुकादेखिको निरन्तर बर्षातले काठमाडौंबाट हुने आन्तरिक र बाह्य उडान अवतरण सेवा प्रभाबित भएको छ । त्रिभुवन अन्तरराष्ट्रिय विमानस्थलबाट हुने उडान अवतरण मध्ये बिहान केही उडान मात्रै भएको विमानस्थल प्रमुख देबेन्द्र कार्कीले जानकारी दिएका छन ।
बिहान ५/७ ओटा उडान बाहेक त्रिभुवन विमानस्थलबाट हुने आन्तरिक तथा बाह्य कुनै पनि उडान नभएको कार्कीले जानकारी दिएका छन । कार्कीका अनुसार शुक्रबार बिहान आन्तरिकतर्फ ५ र अन्तरराष्ट्रियतर्फ ६ उडान अवतरण भएका छन ।
जसमध्ये अन्तरराष्ट्रियतर्फ २ ओटा जहाजले उडान गरेका छन भने ४ ओटा जहाज अवतरण भएको विमानस्थलले जानकारी दिएको छ । बाँकी कुनै पनि उडान हुन नसकेको कार्कीले जानकारी दिएका छन । उनका अनुसार मौसम सुधार भए मात्रै आजको लागि थप उडान गर्न हुनेछ ।
काठमाडौं विमानस्थलबाट बिहान नेपालगञ्जको लागि बुद्ध एयर, यती एयर तथा श्रीएयरलाईन्सले उडान गरेको नेपालगञ्जका विमानस्थल प्रमुख प्रेमनाथ ठाकुरले जानकारी दिए । नेपालगञ्जबाट बिभिन्न दुर्गममा हुने उडानहरु सबै बन्द भएको छ । ठाकुरका अनुसार बिहान काठमाडौंबाट नेपालगञ्जको लागि उडान भए पनि नेपालगञ्जबाट हिमाली जिल्लामा हुने कुनै पनि उडान हुन सकेको छैन ।
