काठमाडौं । विश्व हाल पाँचौ पुस्ताको फाईभजी प्रविधिको खोजमा लागिरहेका बेला चीनले भने सिक्स जीमा ध्यान केन्द्रित गरेकोे छ । चीनको विज्ञान तथा प्रविधि मन्त्रालयले भविष्यमा गरिने नेटवर्क विकासका लागि पूर्वतयारीको घोषणा गरिसकेको छ ।
यसको जग निर्माण पनि गरिसकिएको छ भने केही विज्ञहरुको धारणा लिने क्रममा भने सिक्सजी को गति १ टेराबाईट प्रति सेकेन्ड हुने बताएका छन । जुन फाईभजीको तुलनामा ८ हजार गुणा तीव्र गति हो ।
चीनले सिक्स जीमा अध्ययन अनुसन्धान गर्न २ ओटा सक्रिय अनुसन्धान समूह बनाएको छ । एक समूहले मन्त्रालयगत छलफलका विषयहरु हेर्छ । उक्त समूहले दोस्रो समूहलाई मन्त्रालयगत हिसावले सहयोग गर्छ जुन पुर्ण प्राविधिक सहयोग हो । दोस्रो समूह भने पूर्णतया प्राविधिक समूह हो । जसमा विभिन्न अनुसन्धान तथा प्रविधि विश्वविद्यालयका ३७ विज्ञहरु सामेल छन ।
सिक्सजीको अनुसन्धान हुँदै गर्दा फाईभजी नेटवर्कलाई समेत सोहीअनुसार सक्रिय गर्न सकियो भने अबको १० बर्षमा नयाँ पुस्ताको प्रविधि(सिक्सजी) सार्वजनिक गर्न सकिने विज्ञहरुको भनाई छ । जसको मतलब सन् २०३० सम्ममा सिक्सजी सेवा उपयोग गर्न सकिनेछ ।
सिक्सजीको गति
अहिले सैद्धान्तिक हिसावमा भन्दा सिक्सजी नेटवर्कको गति १ टेराबाईट प्रति सेकेन्डभन्दा उच्च हुनेछ । ‘अथवा ८ हजार गिगाबाईट प्रति सेकेन्ड’, सिड्नी विश्वविद्यालयका विज्ञ डा. मह्युर सिर्वानी मोघाद्दामले बताए ।
‘यसले मानिस र प्रविधिबीचको परस्परतालाई आजको तुलनामा पुर्ण रुपमा परिवर्तन गरिदिनेछ । सिक्सजी युगलाई दिमाग र कम्प्युटरको युग पनि भन्न सकिनेछ । किनकि मानिसको दिमागलाई पनि डिभाईसको रुपमा प्रयोग गर्न सकिनेछ’, उनले भने । सिक्सजी प्रविधि मार्फत उच्च क्वालिटिको १ सय ४२ घण्टा लामो भिडियो पनि एक सेकेन्डमा डाउनलोड गर्न सकिनेछ ।
