काठमाडौं । सरकारले संचालनमा ल्याउन लागेको ‘जनताको जलविद्युत कार्यक्रम’ अन्तरगत सर्वधारणमा सेयर निष्काशनको लागि धितोपत्र बोर्डले नयाँ कानूनी व्यवस्था गरेको छ । बोर्डले धितोपत्र दर्ता तथा निष्काशन नियमावली, २०७३ मा दोस्रो संशोधन गरी सरकारले कार्यान्यनमा ल्याउन लागेको जलविद्युत कार्यक्रममा जनताको लगानी भित्र्याउन नयाँ व्यवस्था गरेको हो ।
उक्त व्यवस्था अनुसार संस्थापकहरुले लिन कबुल गरेको सेयर रकमको न्युनतम १० प्रतिशत चुक्ता भएको र आयोजना निर्माणका लागि वित्तीय व्यवस्थापन भएको वा सोका लागि आशयपत्र प्राप्त भएको अवस्थामा नेपाल सरकारबाट स्वीकृत कार्यक्रम बमोेजिम साधारण पूँजी संकलन गरी जलविद्युत निर्माणमा सेयर तथा डिबेञ्चर निष्काशन गर्न सकिने छ ।
यसरी सेयर निष्काशन गर्नका लागि पनि नेपाल सरकारको न्युनतम ५१ प्रतिशत सेयर स्वामित्व भई आयोजनाको विस्तृत डिजाइन प्रतिवेदन वा आयोजनाको कुल लागत अनुमान र निर्माण अवधि खुलाई तयार गरिएको आधिकारिक विवरण तयार भएको हुनुपर्ने छ । त्यस्ता कम्पनीले सेयर निष्काशन गर्दा तत्कालका लागि सेयर खरिद गर्न चाहने आवेदकले चुक्ता मूल्यको १० प्रतिशत रकम मात्र दाखिल गरे पुग्ने छ ।
कुनै पनि आवेदकले आफुले खरिद गर्न चाहेको सेयर बाँकी ९० प्रतिशत रकम भने आयोजना निर्माणको कम्पीमा ९० प्रतिशत काम भएपछि माग गर्नुपर्ने छ । त्यसरी माग गरिएको १० प्रतिशत रकमको पनि सेयर धनीलाई नेपाल सरकारले निर्धारित गरेको बार्षिक प्रतिफल प्रदान गर्न सक्नेछ भने यस्तो प्रतिफल सेयरको चुक्ता हुन बाँकी रकममा मिलान गर्न पाईने भएको छ ।
कुनै पनि आयोजनाको ५० प्रतिशत काम पुरा भएर जनताबाट कुनै पनि सेयर रकमको शतप्रतिशत रकम उठाएपछि त्यसतो सेयरलाई दोस्रो बजारमा खरिदबिक्री गर्न पाईने छ । तर सेयरको चुक्ताहुन बाँकी सम्पूर्ण रकम प्राप्त नभएमा कम्पनीले त्यसरी चुक्ता हुन बाँकी रकम बराबरको सेयर अन्य इच्छुक खरिदकर्तालाई एक महिनाको समय अवधि दिई सार्वजनिक सूचना निष्काशन गरेर बिक्री गर्न सक्नेछ । तर त्यसरी पनि बिक्री नभएमा बाँकी रहेको सेयर संस्थापक शेयरधनी वा नेपाल सरकारको नाममा रहने छ ।
