बिजखबर संवाददाता
४ माघ, काठमाडौं । राजनीतिक सहमतिको आशामा आइतबार सेयर कारोबार र बजार मूल्य दुबैमा बृद्धि भएको छ । नेप्सेमा आइतबार कुल ४९ करोड ८८ लाख रुपैयाँ बराबरको कारोवार भएको छ । यो रकम अघिल्ला दिनको तुलनामा दोब्बरभन्दा बढी हो ।
स्टाण्डर्ड चार्टर्ड बैंकको करिब २० करोड रुपैयाँको कारोबार भएपछि कारोबार रकम धेरै देखिएको हो । आइतबार नेप्से परिसुचक ५ दशमलव ८३ अंकले बढेको छ । बजार खुलेदेखि उकालो लागेको नेप्से परिसुचक अन्तत ९ सय ४५ दशमलव ३६ अंकमा पुगेर अडिएको छ ।
यसैगरी बजारमा कुल ८ लाख ८३ हजार कित्ता सेयर किनबेच भएको छ ।
आइतबार सवैभन्दा बढी बीमा समुहको परिसुचक २५ दशमलव २४ अंकले बढेको छ । यस्तै, नेप्से परिसुचकमा प्रभाव पार्ने बैंकको परिसुचक ६ दशमलव ४१ अंकले बढेको छ । बजारमा विकास बैंक, जलविद्युत्, फाइनान्स समुहको परिसुचक उकालो लागेको छ भने होटल समुहको परिसुचक भने सामान्य घटेको छ ।
