काठमाडौं । सर्वोच्च अदालतले अबका दिनमा फलफुल तथा तरकारीमा विषादी र कोरोना परीक्षणा गरेर मात्र आयात गर्न आदेश दिएको छ ।
सर्वोच्च अदालतले आज सरकारको नाममा अन्तरिम आदेश जारी गर्दै अबका दिनमा भारत लगायत अन्य मुलुकबाट तरकारी तथा फलफुल आयात गर्दा विषादी र कोरोना परीक्षणा गरेर मात्र आयात गर्न निर्देशन दिएको हो ।
यस अघि पनि सरकारले विषादी परीक्षण गरेर मात्र फलफुल तथा तरकारी आयात गर्न सुरु गरेको थियो । तर पुनः भारत सरकारको आग्रहमा सरकारले विषादी परीक्षणलाई रोकेको थियो ।
तर आज अधिवक्ता मणिराम उपाध्याय लगायत १५ जना अधिवक्ताहरुले दिएको रिट निवेदनमाथी सुनुवाई गर्दै सर्वोच्चले अबका दिनमा विषादी र कोभिड १९ परीक्षण नगरीकन भारत लगायत अन्य मुलुकबाट तरकारी र फलफुल आयात नगर्न सरकारको नाममा अन्तरिम आदेश जारी गरेको हो ।
यसैगरी सर्वोच्चले स्वदेशभित्रै उत्पादित तरकारी तथा फलफुलको समेत विषादी र कोभिड १९ परीक्षण गरेर बिक्री वितरण गर्न आदेश दिएको छ ।
