काठमाडौं । घाटा बेहोरी रहेको नेपाल वायुसेवा निगमले एयरबस ३२० को स्टलमेन्ट बापतको ५० करोड रुपैयाँ रकम बुझाएको छ ।
संचयकोष तथा लगानीबोर्डको ऋण लगानी रहेको एयरबस ३२० तथा एयरबस ३३० को स्टलमेन्ट बापतको ५० करोड रुपैयाँ रकम बुझाएको निगमका सहप्रवक्ता नवराज कोईरालाले जानकारी दिएका छन ।
प्रति स्टलमेन्ट १ अर्ब १३ करोड रुपैयाँ बुझाउनु पर्ने भए पनि अहिले निगमको जहाजले राम्रो ब्यापार गर्न नसकेको भन्दै थोरै रकम बुझाएको हो । अहिले बुझाएको एयरबस ३२० को यो १३ औं स्टलमेन्ट भएको निगमले जानकारी दिएको छ । त्यस्तै एयरबस ३३० को भने दोस्रो स्टलमेन्ट बुझाई सकेको छ ।
निगमको जहाजले जापान तथा कोरिया उडान नभरुन्जेल स्टलमेन्टको रकम कसरी बुझाउने भनेर मन्त्रालयमा समेत छलफल भईरहेको निगमले जानकारी दिएको छ । ‘जापान तथा कोरिया फूलफेजमा उडे पछि भने हामी प्रति स्टलमेन्टको पूरा रकम अर्थात १ अर्ब १३ करोड रुपैयाँ नै बुझाउन सक्छौं,’कोईरालाले भने ।
प्रत्येक ३ महिनामा ४ ओटा जहाजको १ अर्ब १३ करोड रुपैयाँ स्टलमेन्टको रकम बुझाउनु पर्ने भए पनि निगमले सो बराबरको रकम बुझाउन सकेको छैन । सो विषयमा नयाँ ब्यवस्थापन पनि गम्भिर भएर लागेको बताउँदै कोईरालाले भने, ‘अहिले संचयकोष, लगानीबोर्ड तथा निगमबीच त्रिपक्षिय छलफल चलिरहेको छ ।’
गत असार र साउनमा २ ओटा वाईडबडी भित्र्याए पछि निगममा आर्थिक संकट बढेको हो । निगमले आर्थिक संकट झेल्दै गए पछि सरकारसँग सहयोग समेत मागेको थियो । तथापी संस्कृति पर्यटन तथा नागरिक उड्डयन मन्त्री रविन्द्र अधिकारीले भने निगमलाई थप सहयोग दिन नसक्ने बताउँदै आएका छन ।
