काठमाडौं । नेपाल खाद्य संस्थानले दशैं तिहार तथा छठ पर्वलाई लक्षित गर्दै विभिन्न खाद्य सामग्रीमा छुटको मूल्य निर्धारण गरेको छ । संस्थानको बुधबार बसेको बैठकले चाडवाडलाई लक्षित गरी संचालनमा आएका विभिन्न सुपथ मूल्य पसलबाट बिक्री गरिने सामानहरुमा छुट दिएको हो ।
संस्थानका अनुसार चिनी, नुन, चामल, सिमी, फापर, मासु लगायतका घाद्यपदार्थमा छुट उपलब्ध गराएको हो । संस्थानका अनुसार उक्त पसलहरुमा उपभोक्ताहरुले विभिन्न सामग्रीमा ५ रुपैयाँदेखि ५० रुपैयाँसम्म छुट पाउने छन ।
सुपथ मूल्य पसलहरुले उपभोक्तालाई चिनीमा हालको मूल्यमा ५ रुपैयाँ छुट, नुन ५ रुपैयाँ, जीरा मसिनो चामलमा प्रति किलोग्राम ५ रुपैयाँ, वासमती चामलमा प्रति केजी ५, सिमीमा १०, फापर १०, मासु प्रतिकिलो १०, पनिर १० र ध्युमा ५० रुपैयाँ छुट दिने भएको छ ।
यस्तै संस्थानले काठमाडौं उपत्यकाका ३ ठाउँमा सहुलियत पसल संचालनमा ल्याउने भएको हो । संस्थानले पुतलीसडक, थापाथली लगायतका स्थानमा उक्त पसलहरु संचालनमा ल्याउने भएको छ ।
संस्थानले यसअघि असोज १२ गतेदेखि संचालनमा आउने भनिएको सुपथ मूल्य पसलहरु बुधबार बसेको बैठकले १५ गतेदेखि मात्र संचालनमा ल्याउने निर्णय गरेको हो । साथै संस्थानले दशैंका लागि ल्याउने भनेको झन्डै २ हजार खसिबोका तथा च्याङग्रा २ पल्ट गरेर ल्याउने भएको छ । संस्थानले उक्त खसीबोकालाई राख्ने ठाउँ नहुँदा पल्ट गरेर ल्याउन लागेको हो ।
थापाथलीमा भएको गोदाममा निश्चित खसीबोका मात्रै राख्ने ठाउँ भएकाले २ चोटी गरेर खसीबोका ल्याईने संस्थानमा सुचना अधिकारी शंकर सापकोटाले जानकारी दिए ।
यस्तै संस्थानले घटस्थापनासम्म खसीबोका ल्याईने र घटस्थापना पछि बिक्री थाल्ने भएको हो ।
