मोवाइल सेवा प्रदायक कम्पनी एनसेलले विभिन्न देश देशमा फोन गर्दा लाग्ने शुल्कमा घटाएको छ । कम्पनीले ती देशहरुमा अव लोकल कलको दरमै फोन गर्न मिल्ने बनाएको छ ।
कम्पनीले सोमबारदेखि लागू हुने गरी नयाँ योजना ल्याएको हो । जस अन्तरगत विभिन्न ३० देशमा प्रतिमिनेट एक रुपैयाँ ९९ पैसामा फोन गर्न सकिनेछ ।
कम्पनीले ल्याएको सो योजना १५ दिनसम्म लागु हुनेछ । सो सेवा प्रिपेड र पोष्टपेड दुवै ग्राहकलाई उपलब्ध गराइएको कम्पनीद्रारा जारी विज्ञप्तीमा उल्लेख छ ।
कम्पनीका अनुसार भारत, चीन, अमेरिका, बेलायत, क्यानडा, हङकङ, जर्मनी, सिङ्गापुर, स्विडेन, न्युजिल्यान्ड लगायतका देशहरुका लागि यो योजना लागु हुनेछ । हाल यी देशहरुका लागि शुल्क प्रति मिनेट कर बाहेक एक रुपैयाँ ९९ पैसादेखि ४८ रुपैयाँ ९९ पैसासम्म लाग्दै आएको छ ।
यो अफर लिनका लागि एनसेलका ग्राहकले एस्ट्रिक्स्१७१०७ह्यास डायल गरी योजनामा निःशुल्क सहभागी हुन सक्नेछन् । साथै ग्राहकले अंगे्रजीमा ‘ए’ टाइप गरी १७१०७ मा एसएमएस पठाएर वा १७१०७ मा डायल गरी प्राप्त जानकारी अनुसार पनि योे योजना सुचारु गर्न सक्छन् ।
यो योजना ग्राहकलाई सुलभ दरमा गुणस्तरीय सेवा प्रदान गर्ने एनसेलको प्रतिवद्घता अनुरुप ल्याइएको एनसेलका कर्पोरेट संवाद विज्ञ मिलन शर्माले बताए । ‘यसले हाम्रा ग्राहकलाई विदेशमा रहेका आफ्ना परिवारजन तथा साथीभाईसँग अझ सुलभ शुल्कमा सम्पर्कमा रहन सहयोग पुर्याउने छ,’ शर्माले भने ।
यो योजनामा सहभागी भएका ग्राहकले अंगे्रजीमा ‘आर’ टाइप गरी १७१०७ मा एसएमएस पठाई यो योजनाबाट बाहिरीन पनि सक्ने कम्पनीले जानकारी दिएको छ ।
