काठमाडौं । कोरोनाको महामारीसँगै लकडाउन पछि नेपालमा फसेका बिभिन्न देशका ९ हजार ६३५ जना नागरिकहरु स्वदेश फर्केका छन । नेपाल नागरिक उड्डयन प्राधिकरणको तथ्याङ्क अनुसार लकडाउन पछि नेपाल छोड्नेको संख्या १० हजार ४ सय २३ जना रहेका छन । जस मध्ये ९ हजार ६३५ जना विदेशी रहेका छन भने ७८८ जना नेपाली रहेका छन ।
लकडाउन पछि हवाई मार्गबाट नेपालमा आउनेको संख्या भने ६५४ जना रहेको छ । शुक्रबार कुवेतबाट आउने १४२ जनासहित नेपाल आउनेको संख्या ६५४ जना पुगेको हो । शुक्रबारसम्ममा नेपाल आउने नेपालीहरु भने म्यानमारबाट २६ जना, दुबईबाट १६८ जना, अष्ट्रेलियाबाट ११ जना, जापानबाट ७ जना तथा कुवेतबाट ४ सय ४२ जना रहेका छन ।
विश्वभर फैलिएको कोरोना भाईरसका कारण नेपालमा लकडाउन भएको आज ८१ औं दिन पुगेको छ । लकडाउनको बेला सरकारले भने कुनै पनि आन्तरिक वा अन्तरराष्ट्रिय उडान गर्न दिएको छैन । तर यस अघि परराष्ट्र मन्त्रालयको अनुमतिमा नै बिभिन्न हवाई कम्पनीहरुले उडान गरिरहेका थिए ।
परराष्ट्रको अनुमतिमा प्राधिकरणले उडान अवतरणको लागि अनुमति दिँदै आए पनि पछिल्लो समयमा भने सरकार आफैंले अनुमति दिने गरेको प्राधिकरणका प्रवक्ता राजकुमार क्षेत्रीले जानकारी दिएका छन । लकडाउन सुरु भए पछि नेपाली हवाई सेवा कम्पनी नेपाल वायुसेवा निगम, हिमालय एयरलाईन्स, बुद्ध एयर र श्री एयरलाईन्सले अन्तरराष्ट्रिय उडान गरेको प्राधिकरणले जानकारी दिएको छ ।
प्राधिकरणको तथ्याङ्क अनुसार अन्तरराष्ट्रिय उडान गर्नेमा सबै भन्दा बढी निगमको जहाजले ३८, हिमालय एयरलाईन्स २१, श्री एयर ५ र बुद्ध एयरले २ उडान गरेको छ । लकडाउनको अवधिमा बिहीबारसम्म कुल अन्तरराष्ट्रिय उडान भने ११८ ओटा रहेको छ । जस मध्ये कतार एयरको मात्रै १६ उडान रहेका छन भने अन्य बाँकी बिभिन्न विदेशी हवाई कम्पनीको रहेको प्राधिकरणको तथ्याङ्कमा उल्लेख छ ।
