काठमाडौं । संस्कृति, पर्यटन तथा नागरिक उडड्यन मन्त्री योगेशकुमार भट्टराईले नेपालको हवाई क्षेत्रमा पूर्वाधारलगायतमा प्राधिकरणले महत्वपूर्ण योगदान दिएको बताएका छन् । मंगलबार नेपाल नागरिक उड्डयन प्राधिकरण (क्यान)को २१ औं बार्षिकोत्सव कार्यक्रममा बोल्दैं मन्त्री भट्टराईले नेपालको भौगोलिक अवस्थामा पनि प्राधिकरणले ठूलो भूमिका खेलिरहेको भन्दै प्रशंशा गरे । ‘सामान्य संस्थाबाट सुरु भएको यो संस्था अहिले १ हजार कर्मचारी भएको संस्था भएको छ । यसले विगतदेखि हालसम्म राम्रो प्रगति गरेको छ’, मन्त्री भट्टराईले भने ।

समारोहमा नागरिक उड्डयन प्राधिकरण टुक्र्याउने सम्बन्धमा प्राधिकरणका ट्रेड युनियनका अध्यक्ष श्रवणकुमार यादवले जुनसुकै हालतमा प्राधिकरण विभाजन गर्न नदिने भन्दै दिएको अभिव्यक्तिप्रति लक्षित गर्दै मन्त्री भट्टराईले कानून अनुसार नै हुने बताए । ‘संसार गतिशील छ । जब गतिसंगै अघि जान सकिँदैन, तब कुनै प्रगति गर्न सकिदैन, त्यसैले मानिसको चेतनामा पनि परिवर्तन ल्याउनुपर्छ’, भट्टराईले भने । संस्था टुक्र्याउने विषयमा कोही पनि सशंकित नहुन आग्रह गर्दै मन्त्री भट्टराईले यसकोे निर्णय पनि त्यतिकै आएको नभई सरकारबाट अनुमोदित भएर आएको बताए ।

‘विश्वमा बनेको ऐन कानुनमा हामीले हस्ताक्षर गरेका हुन्छौं । प्राधिकरणको विषयमा चासो लिनु भएकोमा धन्यबाद । म विश्वासको साथ भन्छु यहाँसम्म आउँदा धेरै पसिना बगाएको तपाईहरुले सम्झिरहनु भएको होला । म भन्दा धेरै भोटो फटाउनु भएको पनि होला । तर, हामी यहाँसम्म आउन पनि त्यतिकै आएका होइनौं, दुख गरेर भोटो फटाएरै आएका हौं । राज्य चलाउने र पार्टी चलाउने मान्छे तलमाथि भयो भने विश्वास टुट्छ । म यहाँ विश्वास टुटाउन होईन जोडन आएको हो । म राजनितिक ढंगले आएको हुँ, म कुनै लोकसेवा पास गरेर आएको होईन यति कुरा तपाईहरुले बुझ्न हुन्छ भन्ने मलाई लागेको छ’, मन्त्री भट्टराईले भने ।

गुरुकुलमा पण्डित आफैले परीक्षा लिने जस्तो अहिले नहुने बताउँदै मन्त्री भट्टराईले अनुगमन गर्ने पाटो हुने र सबै त्यहीअनुसार अगाडि बढनुपर्छ भन्ने कुरा नबुझेर नै साथीहरुले ताली पड्काएको जस्तो आफुलाई लागेको बताए । उनले भने–‘सरकार कर्मचरीको खिलाप जाँदैन । कानुन बन्दैछ र संसदले अनुमोदन भयो भने यो पास हुन्छ । यसमा साथीहरुले सहयोग गर्नुहुन्छ भन्ने लाग्छ । हड्ताल गर्ने, बन्द गर्ने घेराबन्दी गर्ने जमाना गईसकेको छ । हाम्रो पालामा थियो, अब त्यस्तो हुँदैन र त्यो आवश्यक छैन । तपाईको कुरा नमान्न सकिने अधिकार मसँग छ । एक्सनमा जानूपुर्व यो कुरो सोचेर जानू होला ।’

मन्त्री भट्टराईले सरकारले निर्णय गर्दा खाईपाई आएको भत्ता नकाटिने र बताउँदै सरकारको ढुकुटी सानो र पुँजीगत खर्च धेरै गर्नुपर्ने भएकाले जसले ढुकुटी भर्छ, उसलाई सेवासुविधा पनि बढाउँदै लैजाने बताए । ‘भोलि नियामक र सेवाप्रदाय कुनमा जाने त्यो छनौट गर्ने जिम्मा तपाईमा हुनेछ । राति सिफ्ट हुनेलाई अतिरिक्त भत्ता छदैछ । अरुलाई सम्मान नगर्ने आफुमात्र सम्मान खोज्ने राम्रो होईन । सेवा सुविधामा कम भयो भने ढुकुटी हेरेर थप गर्नेछौं’, उनले भने ।

एक बर्षमा ३ ठुला विमानस्थल संचालनमा ल्याउने तयारी गरिरहेको बताउँदै मन्त्री भट्टराईले ५ बर्षमा निजगढ बनेपछि कस्तो जनशक्ति चाहिन्छ त्यो सोचमा लाग्न आग्रह गरे । उनले भने– ‘नयाँ ठाउँमा जाँदा केही असहज होला । तर, हण्डर ठक्कर खाएर आएको मान्छेले केही बुझेको हुन्छ । प्राधिकरण यहाँसम्म आईपुग्दा र निजी क्षेत्र यहासम्म आईपुग्दा कति हण्डर खाए होलान । त्यसैले त अहिले क्यान यहाँ पुगेको छ । सबैको साथले आज हामी यो स्थानमा आईपुगेका छौं । यूनियनका अध्यक्षले बडो फुर्तिका साथ भन्नू भो । तर, अब हड्ताल, बन्द तालाबन्दी गरेर केही हुँदैन । त्यसबाट म कन्भिन्स हुँदिन । हामी पनि बन्द हड्ताल गरेरै आएको हो । तर अहिले त्यो समय गइसक्यो ।’

मन्त्री भट्टराईले क्यान टुक्र्याउन मस्यौदा मन्तिपरिषदमा जाने बताउँदै बन्द हड्ताल गरेर कन्भिन्स नहुने पनि बताए । उनले बिचार बिमर्श र छलफका लागि सबैलाई स्वागत गर्ने बताउँदै जन्मदिन मनाउने बेला कात्रो लिएर आउछु भनेर घुर्की नलगाउन पनि चेतावनी दिए । यसअघि कार्यक्रममा नागरिक उड्डयन प्राधिकरणको ट्रेड युनियनका अध्यक्ष श्रवनकुमार यादवले जुनसुकै हालतमा प्राधिकरण विभाजन गर्न नदिने बताएका थिए । सरकारले प्राधिकरणलाई टुक्रयाएर नियामक निकाय र सेवाप्रदायकलाई छुट्टा छुट्टै बनाउने तयारी अन्तिम अवस्थामा पुर्याएको अवस्थामा संस्कृति, पर्यटन तथा नागरिक उडड्यन मन्त्री योगेशकुमार भट्टराई उपस्थित रहेको काार्यक्रममै प्राधिकरण युनियन अध्यक्षले यस्तो चेतावनी दिएका हुन् ।

यादबले प्राधिकरण बिभाजनको (नियामक निकाय र सेवा प्रदायक) बिरुद्धमा दोस्रो चरणको आन्दोललनमा रहेको बताउँदैं प्राधिकरण २१ बर्ष अगाडि स्थापना के उद्देश्यले भयो र अहिले के भयो भन्ने प्रश्न गरेका थिए । ‘के प्राधिकरण २१ बर्षको लागिमात्र स्थापना भएको थियो ? ऐनमा भएको कुरा सबै लागू भएको हो ? यसको समीक्षा गर्नु जरुरी छ’, यादबले भने । यादबले संस्था टुक्रयाए पनि उड्डयन क्षेत्रमा समस्या नआउला भन्न नसकिने बताउँदै त्यसलाई पुष्टि गर्ने रिपोर्टहरु आफुहरुसँग रहेको बताए ।

अन्तराष्ट्रिय नागरिक उडड्यन प्राधिकरण (आइकाओले) नेपाली वायुसेवामाथिको कालोसूची हटाएको २ बर्ष भएपनि ईयुले नहटाउनुमा अर्कै स्वार्थ रहेको यादबले बताए । ‘भोलि पोखरा लुम्बिनीलगायतका विमानस्थल हामीलाई संचालन गर्न देउ अनि कालोसूची हटाउला भनेर इयूले भन्ला । एक पछि अर्को शर्त राख्दै जाँदा हामी कहिले उड्ने युरोप ? युरोपबाटै ४ वटा जहाज ल्याईसकेका छौं । कतार, दुबइ किन हुँदैन ? युरोप नै घुस्नु पर्ने ?’ यादबले प्रश्न गरे ।

यादबले जुनसुकै हालतमा प्राधिकरण विभाजन गर्न नदिने दोहोर्याउँदैं मन्त्रीलाई ज्ञापन पत्र बुझाउन खोज्दा वास्ता नगरेको बताउँदैं मन्त्रालयमा गएर दर्ता गरेको बताए । उनले बन्दुक नै देखाएर सोधे पनि कुनै कर्मचारीले संस्था बिभाजन गर्नु पर्छ भनेर नभन्ने बताउँदै प्राधिकरण नेतृत्व प्रति नै प्रश्न तेर्साए ।

‘तपाईहरु नियमक निकायमा हुनुहुन्छ, अहिलेसम्म के–कति प्रगति भयो, के काम गरिरहनुभएको , तपाईं कति दिन बस्नुहुन्छ मन्त्री, डिजी भएर ?’ उनले भने । यादबले सरकारले दिने कर्मचारी भत्ता काट्ने हिम्मत कसैको नभएको बताउँदै हिम्मत भए अगाडि आउन चुनौती दिदै अगाडि आउनेको हात काटिने चेतावनी पनि दिए । उनले सहसचिव पद छोडेर आउने, डिजी पद खाने भन्दै दुबैं हातमा लड्डु खाने तपाईहरु भन्दै नेतृत्वलाई कडा प्रहारसमेत गरे । यादबले महानिर्देशकको कार्यालय तथा मेनगेटसम्म ताल्चा मार्ने र जेल जानु परे पनि जाने तर, प्राधिकरण टुक्र्याउन नदिने बताए ।