कामपाको फोहोर राख्ने स्थल तय, ककनीको १५ रोपनी जग्गामा विसर्जन गरिने

Waste-dumping-in-Sisdol-landfill-site-The-photo-also-shows-scavengers-collecting-the

काठमाडौं । काठमाडौं महानगरपालिकाले वर्षातको समयमा फोहोर विसर्जन गर्नका लागि स्थान पहिचान गरेको छ । अहिले फोहर विर्सजन गरिहेको स्थान भरिएको र अन्य समयमा भन्दा वर्षाद्मा फोहर बढी उत्पादन हुने भएकाले अन्य स्थान तय गरिएको कामपाले जानकारी दिएको छ ।
कामपाको वातावरण विभागका प्रमुख हरिकुमार श्रेष्ठका अनुसार अहिले तय गरिएको स्थान ककनी गाउँपालिका–२ मा रहेको भिलेज एक र भिलेज दुईको १५ रोपनी खाली जग्गा तयार गरिएको हो ।

दीर्घकालीन रुपमा फोहर राख्ने स्थान निर्माणको काम सिसडोलभन्दा दुई किलोमिटर पर बञ्चरेडाँडामा भइरहेको छ । हाल फोहर व्यवस्थापन गर्दै आएको स्थान सिसडोलमा फोहर राख्ने अवस्था नभएकाले वर्षाद्को समयका लागि उक्त स्थान तय गरिएको विभागका प्रमुख श्रेष्ठले जानकारी दिएका छन ।

Bajaj Pulsar Bizkhabar
Suzuki SPresso
Nepaltop Water Tank Sab Thik Thak Bizkhabar TWS

दुई वर्षका लागि फोहर विसर्जन गर्ने भन्दै विगत १३ वर्षदेखि सिसडोलमा फोहर थुपारिँदै आएको छ । फोहर राख्नका लागि तोकिएको समय बितिसक्दासम्म सिसडोलमा नै फोहर राखिरहेकाले स्थानीयवासीलाई समस्या भएको गुनासो पनि गरिरहेका छन् ।

तेह्र वर्षदेखि सिसडोलमा काठमाडौँ उपत्यकाका १८ स्थानीय तहको फोहर विसर्जन गरिँदै आएको छ । उपत्यकाबाट दैनिक करीब एक हजार मेट्रिक टन फोहर निस्कन्छ । उपत्यकाबाट दैनिक उत्सर्जन हुने फोहरमध्ये करीब ७५ प्रतिशत सिसडोलमा व्यवस्थापन गर्ने गरिएको छ । वर्षाद्को समयमा अन्य समयमा भन्दा बढी भान्छाबाट फोहर उत्पादन हुनेहुँदा दैनिक एक हजार २०० मेट्रिक टन फोहर निस्कने गर्दछ ।

शुक्रबार कामपाको वातावरण विभाग प्रमुखसहितको टोलीले उक्त स्थानको स्थलगत अवलोकन गरेको थियो । वातावरण व्यवस्थापन समितिका पदाधिकारीले पनि वातावरण व्यवस्थापन विभागका अधिकारीसहित फोहरको अन्तिम व्यवस्थापन र निर्माणाधीन स्थलको अवलोकन गरेको हो ।

यसैबीच कामपाले बञ्चरेडाँडामा निर्माणाधीन अवस्थामा रहेको पूर्वाधार जतिसक्दो चाँडो सक्न सम्बद्ध पक्षलाई अनुरोध गरेको छ । अहिले नुवाकोटको ककनी गाउँपालिकाको सिसडोलमा फोहर व्यवस्थापन गरिँदै आएको छ । रासस


फेसबूक कमेन्ट गर्नुहोस्

DMCA.com Protection Status