Logo

सम्पदा पुनःनिर्माण र पूर्वाधार विकासमा कामपाको प्राथमिकता, आधुनिक आकाशेपुललाई बढायो बजेट

सम्पदा पुनःनिर्माण र पूर्वाधार विकासमा कामपाको प्राथमिकता, आधुनिक आकाशेपुललाई बढायो बजेट


रासस
27
Shares

काठमाडौं । ऐतिहासिक पुरातात्विक सम्पदा रानीपोखरी, काष्ठमण्डपलगायत क्षेत्रको पुनःनिर्माणसहित काठमाडौँ महानगरपालिकाले आगामी आर्थिक वर्षका लागि पूर्वाधार क्षेत्रमा सबैभन्दा बढी रकम विनियोजन गरेको छ ।

विनाशकारी भूकम्पबाट क्षतिग्रस्त पुरातात्विक सम्पदाको पुनःनिर्माणमा ढिलाइ भइरहेका बेला कामपाले ती सम्पदाको पुनःनिर्माणसहित आर्थिक वर्ष २०७५÷७६ का लागि बजेट विनियोजन गर्ने क्रममा बसैभन्दा बढी पूर्वाधार विकासका लागि ३ अर्ब ६ंंंंं करोड २५ लाख बजेट विनियोजन गरेको हो ।

यसअघि नै रानीपोखरीको पुनःनिर्माणको काम शुरु भए पनि आधुनिक निर्माण सामग्री प्रयोग भएको भन्दै विरोध आएपछि अहिले उक्त आधुनिक सामग्री हटाउने काम भइरहेको छ भने काष्ठमण्डपको पुनःनिर्माणका लागि क्षमा पूजा एक महिनाअघि नै सकिसकेको र अहिले निर्माणका सामग्री जुटाउने काम भइरहेको र अबको करीब २ महिनामा निर्माण कार्य शुरु हुनेछ ।

कामपाका उपप्रमुख हरि प्रभा खड्की (श्रेष्ठ)ले कामपाको पूर्वाधार विकास नै सम्पूर्ण विकास प्रक्रियाको मुख्य बिन्दु भएकाले यस क्षेत्रमा अन्य क्षेत्रमा भन्दा धेरै बजेट विनियोजन गरिएको बताइन ।

पूर्वाधार विकासअन्तर्गत सम्पदा, सुविधासम्पन्न सडक व्यवस्थापन, ढल व्यवस्थापन, प्रदूषण नियन्त्रण र व्यवस्थित यातायातको सञ्चालन महानगरवासीको चाहनाअनुरुप यस क्षेत्रमा बढी बजेट विनियोजन गरिएको छ ।

यसैगरी दरबार हाइस्कुल पुनःनिर्माण, आधुनिक आकाशे पुल निर्माणका लागि पनि प्राथमिकता दिएको छ । कामपाले सबै क्षेत्रमा गरी कूल १३ अर्ब २ करोड १२ लाख ३७ हजार आय व्यय प्रस्ताव प्रस्तुत गरेको छ ।

महानगरले आन्तरिकतर्फ ४ अर्ब ९० करोड २१ लाख ५७ हजार, बाह्य स्रोतबाट ५ अर्ब १९ करोड र अन्य स्रोतबाट १ अर्ब ४ करोड ११ लाख आय अनुमान गरेको छ ।

आगामी आवका लागि प्रस्तुत गरिएको बजेटमा कार्यालय सञ्चालन तथा प्रशासनिक खर्चका लागि रु एक अर्ब ९३ करोड २५ लाख, शहरी विकासतर्फ रु सात करोड ८१ लाख, विपद् व्यवस्थापनतर्फ रु १६ करोड ७८ लाख, वातावरण व्यवस्थापनतर्फ रु ५४ करोड ४६ लाख छुट्याइएको छ ।

वातावरण र विपद् व्यवस्थापनमा जल उत्पन्न प्रकोप नियन्त्रण, जलवायु परिवर्तन, जलाधार क्षेत्रको संरक्षण, फोहरमैला व्यवस्थापन, ल्याण्डफिल साइट व्यवस्थापन, वन तथा भू–संरक्षण, वातावरण संरक्षण, वारुणयन्त्र सञ्चालन र विपद्सम्बन्धी कार्यलाई महानगरले अगाडि बढाउने उल्लेख गरेको छ ।

प्रतिक्रिया दिनुहोस्
MBL