काठमाडौं । चिनियाँ प्रविधि क्षेत्रको विशाल कम्पनी टेन्सेन्टद्वारा प्रबद्र्धित टेन्सेन्ट म्यूजिकले संयुक्तराज्य अमेरिकामा १ अर्ब ७ लाख डलरको सेयर निष्काशन गर्ने घोषणा गरेको छ ।
टेन्सेन्ट म्यूजिक बुधबार न्यूयोर्क स्टक एक्सचेन्जमा सूचीकृत पनि हुँदैछ । हङकङ स्टक एक्सचेन्जमा बुझाइएको कागजातमा टेन्सेन्ट म्यूजिकको प्रति सेयर मूल्य १३ अमेरिकी डलर तोकिएको छ ।
वालस्ट्रिटमा पहिलोपटक पदार्पण गरेको टेन्सेन्ट म्यूजिकको प्रति सेयर मूल्य तोकिएसँगै कम्पनीको बजार मूल्य २१ अर्ब ३० करोड डलर पुगेको छ । यसै वर्षको सुरुमा गरिएको प्रक्षेपणमा यस म्यूजिक कम्पनीको मूल्य २५ अर्ब डलर वा सोभन्दा बढी हुने अनुमान गरिएको थियो ।
कम्पनीले ९ महिनाको अवधिमा एक अर्ब ९० करोडको कारोबार गरेको र ४७ करोड ४० लाख डलर नाफा गरेको छ । टेन्सेन्टले चीनमा स्पटीफाई जस्तै क्यूक्यू म्यूजिकबाट स्ट्रीमिङ सेवा उपलब्ध गराउँदै आएको छ । साथै अमेरिकी कम्पनी वार्नर म्यूजिकको सेवा समेत आफ्ना ग्राहकलाई बिक्री वितरण गर्दै आईरहेको कम्पनीले जानकारी दिएको छ ।
यस कम्पनीले चीनमा १ अर्बभन्दा बढी प्रयोगकर्ता रहेको वीच्याट सामाजिक सञ्जाल सञ्चालन गरिरहेको छ । यस कम्पनीले गेमिङ र विज्ञापन समेतका अन्य व्यवसाय समेत संचालन गरिरहेको छ । अनलाइन भिडियो, क्लाउड सर्भिसेज र आर्टि्फिसियल इन्टेलिजेन्स जस्ता सेवा पनि सञ्चालन गर्न लागेको कम्पनीले जानकारी दिएको छ।
चीनका ठूला प्रविधि क्षेत्रका कम्पनीहरु अमेरिकी सेयर बजारमा सूचीकृत हुनेक्रम बढेको छ । यसअघि अलिबाबा र बाइडु पनि अमेरिकामा सूचीकृत भइसकेका छन् ।
