काठमाडौं । हिमालय एअरलाइन्स्ले काठमाडौंबाट कोलम्बो घुम्न जाने योजना बनाइ रहेका ग्राहकहरुका लागि आकर्षक टिकट दर अफर ल्याएको छ । कम्तिमा पनि दुइ जना सदस्य रहनुपर्ने सो परिवारको लागि एअरलाइन्स्ले दुई तर्फी भाडादर रु. ३५ हजार प्रतिव्यक्ति तोकिएको छ । साथै सो मूल्यमा ट्याक्स कायम नगरिएको बताइएको छ ।
आकर्षक टिकट दर पुष १६ सम्म लागू हुनेछ । टिकट खरीद मिती भने कार्तिक १४ कायम गरिएको छ । कोलोम्बो छट्टी मनाउनको लागि परिचीत गराइएको एउटा नयाँ गन्तब्य भएकोले सो कुरालाई मध्यनजर गर्दै एयरलाइन्सले यस्तो अफर ल्याएको एयरलाइन्सका भाइस प्रेसिडेन्ट विजय श्रेष्ठले बताए ।
सो टिकट दरबाट धेरै ग्राहक लाभान्वित हुने उनको विश्वास छ । ग्राहकहरुले सो सेवाको टिकट एअरलाइन्स्को सेल्स र रेजर्भेशन कार्यलय वा आफूलाई उपयुतm लागेको ट्राभल एजेन्टहरुबाट बुक गर्न सक्नेछन् । एयरलाइन्सका अनुसार हाल साताको दुई दिन मंगलवार र शनिवार श्रीलंका उडान भइरहेको छ ।
हिमालय एयरलाइन्सले गत जेठ देखि दोहा, कतारमा उडान गरेर आफ्नो पहिलो अन्तर्राष्ट्रिय व्यावसायिक उडान शुरु गरेको थियो । केही महिनापछि एयरलाइन्सले दिल्ली, याङ्गोन, दमामलगायत बेइजिङ, ल्हासा, चेंगदु, बैंकक, हङकङ र दुवईमा पनि उडान गर्ने योजना बनाएको छ ।
हिमालय एयरलाइन्सले आगामी पाँच वर्ष भित्र पन्ध्र वटा एअरबस जहाज ल्याएर काठमाडौँबाट एसियाका विभिन्न गन्तब्य तथा अन्य मुलुकका विभिन्न शहरहरुमा उडान गर्ने तयारी गरिरहेको छ । एयरलाइन्सले केही समयपछि लामो दुरी उडान भर्ने ए ३३० जहाज ल्याएर जापान, कोरिया, युरोप, अष्ट्रेलिया र अमेरिकाको लागि उडान भर्ने योजना बनाएको बताएको छ ।
