काठमाडौं । यातायात व्यवस्था विभागले नंवर प्लेट विना सडकमा गुड्ने विद्युतिय स्कुटरहरुलाई कारवाही गर्ने भएको छ । विभागले दर्ता नभईकन विना नंवर प्लेट सडकमा गुड्ने सवारीसाधनलाई तथा विशेषगरी विद्युतीय स्कुटरलाई कारवाही गर्नलाई सर्कुलर जारी गरेको हो ।
नेपालमा हालसम्म कानुनी अड्चनका कारणले विद्युतीय सवारीसाधनहरु सडकमा विना लाईसेन्स, विना दर्ता तथा विना नंवर प्लेट गुड्ने गरेका थिए । विभागले हालै मात्रै यातायात व्यवस्था ऐनमा टेक्दै यस्ता सवारीसाधन तथा स्कुटर नियमन गर्नका लागि सर्कुलर जारी गरेको हो ।
यातायात व्यवस्था ऐन २०४९ मा कुनैपनि सवारीसाधन विदेशबाट पैठारी गरेको १५ दिनभित्र दर्ता गरेर मात्रै संचालनमा ल्याउन पाउने उल्लेख छ । तर हाल विभिन्न कम्पनीहरुले विदेशबाट विद्युतीय स्कुटरहरु भित्र्याएर करको दायरामा नआईकनै सडकमा गुडाईरहेका छन । हाल नेपालमा हिरो, होन्डा, बजाज लगायत बहुराष्ट्रिय कम्पनीका स्कुटरहरु नेपालका सडकमा विना दर्ता गुडिरहेका छन । तर यातायात व्यवस्था ऐन २०४९ मा यान्त्रिक शक्तीबाट चल्ने जुनसुकै सवारीसाधन पनि दर्ता भएर मात्रै सडकमा चलाउन पाईने उल्लेख छ ।
विभागले अबको १५ दिनभित्र यस्ता सवारीसाधनहरु चलाउनका लागि दर्ता गराएर तथा लाईसेन्स लिएर मात्रै चलाउन सर्कुलर जारी गरेको छ । विभागले अव यस्ता सवारीसाधनहरु सडकमा चलाएको देखेमा सवारी तथा यातायात व्यवस्था ऐनको दफा १६० को उपदफा २ को ख अनुसार १ हजारदेखि ५ हजारसम्म जरिवाना तिराउने भएको छ ।
विभागले यसअघि पनि २०७३ बैशाखमा पनि यस्ता सवारीसाधनलाई नियमन गर्नका लागि मापदण्ड बनाएर मन्त्रालय पठाएको जानकारी दिएको थियो । विभागका तत्कालिन महानिर्देशक चन्द्रमान श्रेष्ठले विद्युतीय स्कुटर पनि यान्त्रिक सवारीसाधनमा नै पर्ने भन्दै भौतिक तथा यातायात मन्त्रालयमा यसको मापदण्ड पठाएका थिए ।
सोही अनुसार उक्त मापदण्ड मन्त्रालयमै अड्कीएपछि विद्युतीय स्कुटर नियमनको काम अघि बढेको थिएन । यसअघि विद्युतीय स्कुटर चलाउने चालकलाई सवारी चालक अनुमतीपत्र लाईसेन्सको समेत आवश्यकता पर्दैनथ्यो । तर अब भने विभागले विभिन्न आयातकर्तालाई नै विद्युतीय सवारीसाधन विदेशबाट आयात गरेको १५ दिनभित्र विभिन्न यातायात कार्यालयमा दर्ता गराएर मात्र संचालनमा ल्याउन निर्देशन दिएको छ ।
