आर्थिक संकटका कारण सञ्चालनमै समस्या आएको भारतको राष्ट्रिय ध्वजाबाहक एयर इण्डियामा सरकारले २१ अर्ब भारु लगानी थप गर्ने भएको छ । यो रकम सरकारले बुधबार नै एयर इण्डियालाई बुझाई सकेको छ ।
एयर इण्डियाको सञ्चालनलाई नियमितता दिन सरकारले लगानी थपेको अधिकारीहरुले जनाएका छन् ।
बर्षौं अघिदेखि सञ्चालनकै लागि संघर्ष गरिरहेको एयर इण्डिया बन्द हुनबाट रोक्न सन् २०१२ मै चार अर्ब ५० करोड डलर आवश्यक थियो ।
तर, कम्पनीका अधिकारीहरु भने सञ्चालनका लागि थप रकम आवश्यक पर्ने अथवा नपर्ने विषयमा प्रतिक्रिया दिएका छैनन् ।
प्रधानमन्त्री नरेन्द्र मोदी र उनको सरकारले एयर इण्डियामा ऋण बढ्दै गएपछि यसमा निजी क्षेत्रको संलग्नता पनि खोजिरहेको थियो । यसका लागि एयर इण्डियाको सेयर विक्रि गरेर करिब १२ अर्ब डलर उठाउने सरकारको लक्ष्य थियो ।
तर, मे ३१ सम्मका लागि तोकिएको सेयर विक्रि सम्बन्धि टेण्टरमा एयर इण्डियाले एउटा पनि निवेदन प्राप्त गर्न सकेन । यो घटना पछि भारत सरकार फेरी एक पटक सेयर विक्रिको प्रस्ताव बाहिर ल्याउने तयारीमा छ ।
विश्लेषकहरुले रकम लगानी नगरे संस्था ७ अर्ब डलर भन्दा बढी ऋणमा डुब्ने जनाएका थिए । सेण्टर फर एसिया प्यासिफिक एभिएसनले एयर इण्डियाले आगामी दुई वर्षभित्र दुई अर्ब डलर गुमाउने अनुमान गरेको छ ।
