काठमाडौं । चीन सरकारको आर्थिक तथा प्राविधिक सहयोगमा रसुवामा सुख्खा बन्दरगाहा निर्माण हुने भएको छ । चिनियाँ युआन १२ करोड ४० लाखको लागतमा रसुवाको टिमुरेमा सुख्खा बन्दरगाह निर्माण हुने भएको हो ।
करिब ५ हेक्टर क्षेत्रफलमा निर्माण हुने उक्त बन्दरगाहको निर्माण तिबत फूली कन्स्ट्रक्सन ग्रुप कम्पनीले गर्ने भएको छ ।
उक्त बन्दरगाहमा ३ सय ५० ठूला ट्रकहरु पार्किङ्ग गर्न सकिने गरी करिब ५ हजार वर्गमिटरको ५ तले सीमा जांचपास भवन, ७५० वमिको पार्किङ, २०८० वमिको २ वटा जांचपास कक्ष, कार्गो गोदाम, लिटिगेशन गोदाम रहने छ ।
सो बन्दरगाह निर्माणका लागि आवश्यक जग्गा नेपाल सरकारले व्यवस्थापन गरिसकेको छ भने कम्पनीसँग सम्झौता समेत भईसकेको छ ।
नेपाल इन्टरमोडल यातायात विकास समितिका उपनिर्देशक हरेकृष्ण मिश्र तथा निर्माण कम्पनीका याङ्ग इनलिन प्रोजेक्ट मेनेजरले उक्त सम्झौतामा हस्ताक्षर गरेका हुन । उक्त बन्दरगाह निर्माण कार्य सुुरु गरेको मितिले साढे २ बर्षमा सम्पन्न हुने छ ।
उक्त बन्दरगाहको डिजाइन चिनियाँ आर्किटेक्चरल रिकनिसियन्स एण्ड डिजाइन इन्स्टिच्युट अफ तिबत अटोनोमस रिजनले तयार गरेको थियो ।
चीन सरकारको सहयोगमा निर्माण हुन लागेको सो बन्दरगाह उत्तरी नाकामा दोश्रो हो । हालै मात्र सिन्धुपाल्चोकको लार्चामा चीन सरकारले तातोपानी सुख्खा बन्दरगाहको निर्माण सम्पन्न गरी नेपाल सरकारलाई हस्तान्तरण गर्न तयारीमा रहेको छ ।
मुलुकका उत्तरी नाकामा निर्मित सुख्खा बन्दरगाहहरुले नेपाल र चीनबीच हुने अन्तरराष्ट्रिय व्यापारमा कोशेढुंगाको काम गर्नेछ ।
