काठमाडौं । भुकम्प पीडित बनेर पहिलो किस्ताको रकम लिएर घर नबनाउने नम्कली भुकम्प पीडितबाट पुनर्निर्माणा प्राधिकरणले ठूलो रकम असुल गरेको छ ।
केन्द्रिय आयोजना कार्यान्वयन ईकाई (अनुदान ब्यवस्थापन तथा पूर्वधार) का प्रमुख गणेशराज ओस्तीका अनुसार हालसम्म नक्कली भुकम्प पीडितबाट २१ करोड ४४ लाख ४ हजार रुपैयाँ रकम फिर्ता गरिसकेको छ ।
जस मध्ये दोहोरो भुक्तानी लिएका २० करोड ९ लाख ५४ हजार रुपैयाँ, पहिलो किस्ता लिएर घर नबनाउनेबाट ७१ लाख ५० हजार रुपैयाँ फिर्ता गरिएको हो । साथै लामो समयसम्म केवाईसी फर्म नभरी बैंकमा नै जम्मा भएको रकम ६३ लाख रुपैयाँ गरी २१ करोड ४४ लाख ४ हजार रुपैयाँ रकम असुल गरिएको ओस्तीले जानकारी दिएका छन ।
हाल नक्कली भुकम्प पीडित बनेर पैसा लिने लाभग्राहीको संख्या अझै धेरै भएको र उनीहरुको तथ्याङ्क संकलन गर्ने काम भइरहेको प्राधिकरणले जानकारी दिएको छ । उनीहरुको स्थानीय तहको सहायतामा खोजी कार्य जारी रहेको समेत प्राधिकरणले बताएको छ ।
यसरी भुकम्प पीडितको रकम फिर्ता भए पनि बाँकी घर बनाउँदै गरेका नीजिआवास पुनर्निर्माण सम्पन्न हुन अझै एक बर्ष लाग्ने प्राधिकरणले जानकारी दिएको छ ।
प्राधिकरणको समयावधि सकिन अब करिब डेढ बर्ष मात्रै बाँकी रहेको छ । तर हाल सम्म भुक्म्पबाट ध्वस्त भएका घरहरु मध्ये ३ लाख ८२ हजार ४३ घरधुरी मात्रै निर्माण सम्पन्न भएको राष्ट्रिय पुनर्निर्माण प्राधिकरणको तथ्याङ्कमा उल्लेख छ ।
प्राधिकरणको तथ्याङ्क अनुसार ८ लाख २४ हजार ४ सय ५२ घरधुरी लाभग्राही सुचीमा परेका थिए । तथ्याङ्क अनुसार अझै ६ लाख १२ हजार १ सय ५२ घर भने निर्माणकै चरणमा रहेको छ ।
प्राधिकरणको तथ्याङ्क अनुसार हाल सम्म ४ लाख ३ हजार २ सय ८० जनाले मात्रै तेस्रो किस्ता बापतको रकम बुझेका छन भने ५ लाख ६४ हजार ३ सय ४२ जनाले दोस्रो किस्ताको रकम बुझेका छन ।
प्राधिकरणले ७ लाख ६० हजार २ सय ७९ घरधुरीसँग अनुदान सम्झौता गरेको थियो । जसमा ७ लाख ५५ हजार ८ सय ६८ जनाले पहिलो किस्ताको रकम बुझेका छन ।
