काठमाडौं । सरकारले लगानी सम्मेलनमार्फत यातायात पुर्वाधारमा २३ अर्ब रुपैयाँ बराबरका विदेशी लगानी भित्र्याउने पहल गरेको छ ।
लगानी बोर्डले यातायात पूर्वाधारका विभिन्न ११ ओटा परियोजना छनौट गर्दै ती परियोजनाहरुमा लगानी सम्मेलनमार्फत लगानी भित्र्याउन लागेको हो ।
सम्मेलनमा पूर्वाधार विकासलाई प्राथमिकता दिँदै क्षेत्रिय अन्तरराष्ट्रिय विमानस्थलदेखि, पूर्व पश्चिम रेल्वे तथा काठमाडौंको मेट्रो रेलमा विदेशी लगानी भित्र्याउन पहल गर्ने भएको छ ।
यही चैत १५ र १६ गते हुने लगानी सम्मेलनका लागि बोर्डले २३ खर्ब १५ अर्ब ४२ करोड रुपैयाँ बराबरका ११ ओटा परियोजना सोकेसमा राखेको छ ।
बोर्डका अनुसार पूर्वपश्चिम विद्युतिय रेल विस्तारका लागि मात्रै ३ अर्ब अमेरिकी डलरको परियोजना अगाडी सारिएको छ । पूर्व मेचिदेखि पश्चिम महाकालीसम्मका २४ ओटा जिल्लालाई छोएर बन्ने उक्त परियोजनाको फिजिविलिटी अध्ययन भईसकेको छ । उक्त परियोजनाका लागि २ हजार २ सय ४७ हेक्टर वन क्षेत्र आवश्यक पर्ने पनि लगानीबोर्डले जानकारी दिएको छ ।
बोर्डका अनुसार सम्मेलनलाई नै लक्षित गरी अगाडी सारिएको काठमाडौं पोखरा रेलमार्ग विस्तारको परियोजना पनि रहेको छ । काठमाडौं देखि पोखरासम्म १ सय ८७ किलोमिटरको उक्त रेलमार्गका लागि बोर्डले २ अर्ब ८३ करोड अमेरिकी डलर लगानीको अनुमान लगाएको छ ।
यस्तै अन्य परियोजनामा विराटनगर क्षेत्रिय अन्तरराष्ट्रिय विमानस्थल ३६ करोड डलर तथा काठमाडौंको रिङरोडमा तिव्र विद्युतीय बस सेवा संचालन गर्नका लागि १४ करोड ९५ लाख डलरको परियोजना अगाडी सारेको छ ।
२५ करोड ८० लाख डलर लागतको धनगढी क्षेत्रीय अन्तरराष्ट्रिय विमानस्थल, सुदुरप्श्चिममै तीब्र बस सेवाका लागि ४ करोड लागतको परियोजना, काठमाडौं उपत्यकामा मेट्रो रेल गुडाउन ५ खर्ब ४७ अर्ब रुपैयाँको परियोजना पनि सरकारले लगानी सम्मेलनका लागि अगाढी बढाएको छ ।
