काठमाडौं । काठमाडौं महानगरपालिकाले निर्माण गर्न लागेको तिनकुने शान्ति मण्डला चीन सरकारले बनाइदिने भएको छ । तिनकुनेमा बनाउन लागिएको सो मण्डला चीनको छेन्दु नगरपालिकाले निर्माण गरिदिने काठमाडौं महानगरपालिकाका प्रवक्ता ज्ञानेन्द्र कार्कीले जानकारी दिए । ‘छेन्दु नगरपालिका मेयरले काठमाडौं महानगरलाई सहयोग गर्ने बचववद्धता गरेका छन,’ उनले भने ‘हामीले मण्डला निर्माणमा सहयोग गर्न आग्रह गर्ने गरेका छौं ।’
कार्कीका अनुसार त्यतिवेला छेन्दुका मेयरले कुनै एउटा परियोजनामा लगानी गर्ने चासो व्यक्त गरेका थिए । सोही अनुसार मण्डला निर्माणको कार्य चीनलाई दिन लागिएको हो । उक्त मण्डला निर्माण्का लागि १ अर्ब २५ करोड रुपैयाँ निर्माण लागत लाग्ने भएको छ । सो रकम चीन सरकारले व्यहोर्ने भएको छ ।
चीनलाई निर्माणको जिम्मा दिएको अवस्थामा काम छिटो सम्पन्न हुने उनको विश्वास छ । निर्माण सम्वन्धमा छेन्दु र काठमाडौं महानगरवीच चाँडै नै सम्झौता सम्वन्धी आवश्यक प्रक्रिया अघि बढाइने कार्कीले जानकारी दिए । यसका लागि महानगरपालिकाका टोली चीन भ्रमणमा जाने तयारी गरिएको उनले जानकारी दिए ।
तिनकुने शान्ति मण्डला निर्माण लागत सवा अर्ब रुपैयाँ पुग्ने भएको छ । मण्डलाको डिजाइन सम्बन्धी काम पाएको आर्किटेक्ट डिजाइन एसोसिएट्स उक्त लागत खर्च सहित महानगरपालिकालाई रिपोर्ट बुझाएको थियो । महानगरले विस्तृत अध्ययनका लागि आर्किटेक्ट डिजाइन एसोसिएट्ससोही कम्पनीलाई निर्देशन समेत दिएको छन् ।
महानगरपालिकाले आन्तरिक तथा बाह्य पर्यटकलाई आकर्षित गर्ने उद्देश्यका साथ बुद्धको विशाल मूर्तिसहितको मण्डला निर्माण गर्न लागेको कार्कीले जानकारी दिए । सो संरचना तिनकुनेको ५० रोपनी जग्गामा तयार गर्न लागिएको हो । तिनकुने शान्ति मण्डला आगामी ५ बर्ष्भित्र बनाइसक्ने योजना अनुरुप प्रक्रिया शुरु गरिएको छ । ‘मन्त्रालयले प्रस्ताव स्वीकृत गरेलगत्तै अत्याधुनिक मण्डला निर्माण कार्य शुरु गर्ने छौं,’ उनले भने ।
सो मण्डल निर्माणको प्रस्ताव संघीय मामिला तथा स्थानीय विकास मन्त्रालयले प्रस्ताव स्वीकृत गर्नुपर्छ । तिनकुनेमा बन्ने भनिएको सो मण्डला संसारकै आकर्षक स्थल बन्ने विश्वास महानगरको छ ।
शन्ति मण्डला तिनकुनेको ट्राफिक आइल्याण्ड साइडको खाली जग्गामा बन्ने भएको हो । जुन काठमाडौं, ललितपुर र भक्तपरको मध्य भागमा पर्छ । सो शान्ति मण्डलाको मूख्य आकर्षण बुद्धको विशाल मूर्ति हुनेछ । जुन १६ मिटर उचाइको बन्ने छ ।
