काठमाडौं । नेपाल वायुसेवा निगमले बोईङ ७५७ जहाज बिक्री गर्न इच्छुक कम्पनीसँग बार्ता गर्ने भएको छ ।
यही हप्ता १५ दिनको समय दिएर बार्ताको लागि आह्वान गर्ने तयारी भईरहेको निगमका कार्यकारी अध्यक्ष मदन खरेलले जानकारी दिएका छन । दुई पटक आह्वान गरेको टेण्डरमा समेत बोईङ ७५७ जहाज बिक्री गर्न नसके पछि निगमले इच्छुक कम्पनीसँग बार्ता गर्न लागेको हो ।
निगमले आफ्नो बोईङ ७५७, ९ एन जहाज बिक्रीका लागि लिलामीमा राखेपनि आवेदन नपर्दा बिक्री गर्न सकेको छैन । निगमले सो जहाज बिक्री गर्नका लागि असार ११ गते ४५ दिनको समय सिमा राखेर टेण्डर आह्वान गरेको थियो । तर सो समयमा कुनै आवेदन नपरे पछि पुनः १५ दिनको समय राखेर आवेदन माग गरेको थियो । तर, थप गरेको समयमा समेत कुनै आवेदन नपरे पछि बार्तामार्फत जहाज बिक्री गर्न लागेको हो ।
सो जहाज बिक्री गर्नका लागि पहिले गरेको मूल्याङकन भन्दा कम दाम आए पनि जहाज बिक्री गर्ने खरेलले बताए । खरेलले भने, ‘हामी बार्तामा आउने टोलीसँग बसेर छलफल गछौं जस्ले धेरै दाम दिन्छ जहाज उसैलाई दिने हो कम दाम दिनेलाई दिन त सकिँदैन । यस अघि उक्त जहाजको ७६ करोड रुपैयाँको मूल्याङकन गरेको थियो ।
निगमले ग्राउण्डेड ४ जहाज संचालनमा ल्याउने
त्यसतै निगमले लामो समयदेखि ग्राउण्डेड ५ ओटा जहाज मध्य ४ ओटा जहाज भने यही कात्तिक अन्तिम देखि संचालनमा ल्याउने भएको छ । खरेलका अनुसार वाई १२ जहाज ३ र एनए ६० जहाज १ भने कात्तिक अन्तिमदेखि संचालनमा आउनेछ । भने ५ बर्ष भन्दा अघिदेखि ग्राउण्डेड टुईनअटर भने अझै केही समय लाग्ने छ ।
‘कहिले जहाजको पार्टपुर्जा नआउने त कहिले चिनियाँहरु समयमै आएर नबनाउनाले गर्दा यस्तो समस्या भएको हो’, उनले भने, ‘जहाज छिटै संचालनमा ल्याउने भनेर इन्जिनियरको टोलीले लिखित दिएको धेरै भयो तर यस पटक भने त्यस्तो नहोला ।’
