नेपालका लागि भारतका राजदूत मञ्जीभ सिंह पुरीले भारत नेपाल विकासको गेम चेञ्जर भएको बताएका छन् । आईतवार मात्रै राष्ट्रपति विद्यादेवी भण्डारीबाट ओहोदाको प्रमाणपत्र लिएका राजदूत पुरीले सर्वाजनिक कार्यक्रममा पहिलो पटक भाषण गर्दै ‘नेपालको विकासमा भारत गेम चेञ्जर’ भएको बताएका हुन् ।
उनले नेपालमा हालै सम्पन्न भएको पूर्वाधार विकास सम्मेलन र लगानी सम्मेलनमा भारतका दुई मन्त्री आउनु महत्वपूर्ण भएको बताए । ‘हालै नेपालमा आयोजित पूर्वाधार र लगानी सम्मेलनमा भारतका दुई क्याविनेट मन्त्रीको सहभागीता भयो’ उनले भने, ‘उनीहरुले लगानी वृद्धि र कनेक्टीभीटीको प्रतिवद्धता व्यक्त गरे जुन महत्वपूर्ण छ ।’
उक्त अवसरमा उद्योग मन्त्री नविन्द्रराज जोशीले नेपालमा लगानीको उपयुक्त वातावरण बनिरहेको बताए । उनले नेपालमा दोस्रो चरणको आर्थिक सुधार शुरु भएको बताउँदै नेपालमा लगानीका लागि आग्रह समेत गरे । उनले लगानीकर्ताका सवैखाले समस्या समाधानका लागि सरकार तयार रहेको समेत बताए ।
विदेशी लगानीकर्ताको सर्त, ‘एकद्वार सेवा र वौद्धिक सम्पत्ति’
कार्यक्रममा सहभागी विदेशी लगानीकर्ताले नेपालमा विदेशी लगानी आकर्षण गर्न एकद्वार सेवा शुरु गर्न तथा वौद्धिक सम्पत्ति संरक्षणको प्रत्याभुति दिन सुझाव दिए । उनीहरुले नेपालमा नाफाको राम्रो सम्भावना भएपनि कतिपय सुधार आवश्यक रहेको औल्याए ।
बहुराष्ट्रिय कम्पनी सुर्य नेपाल प्रालिका प्रमुख कार्यकारी अधिकृत अभिमन्यू पोदारले नेपालमा व्यवसाय गरेर आर्जन गरेको नाफा फिर्ता लैजान दिनुपर्ने बताए । अरुण तेस्रो आयोजना प्रमुख एससी अग्रवालले नेपालमा बनको समस्या धेरै रहेको बताए । त्यस्तै, नेपाल एसबीआई बैंका प्रबन्ध निर्देशक अनुकुल भटनागरले विदेशी लगानी आकर्षणका लागि एकद्वार सेवा आवश्यक रहेको बताए ।
