काठमाडौं । कोरोनाभाईरस महामारीका कारण मेक्सिकोबाट उत्पादन हुने विशवकै लोकप्रिय मध्येका कोरोना बियरको उत्पादन अस्थायी रुपमा स्थगित भएको छ । मेक्सिको सरकारले अत्यावश्यक सेवाबाहेकका सबै उद्योगधन्दाहरु बन्द गर्न आह्वान गरेपछि कोरोना बियर उत्पादन बन्द गरेको बियर उत्पादक ग्रुप मोडल नामक कम्पनीले आफ्नो ट्विटरमा उल्लेख गरेको छ ।
यसै हप्ता मात्रै मेक्सिकन सरकारले अत्यावश्यक बाहेकका सबै सेवाहरु आगामी अप्रिल ३० सम्मका लागि प्रतिबन्ध लगाएको छ । मेक्सिकोमा हाल १ हजार ५ सय जना कोरोनाका संक्रमित पत्ता लगाईएको छ भने, यसका कारण मृत्यु हुनेको संख्या ५० पुगेको छ ।
अमेरिकामा उक्त कम्पनीको कोरोना बियर कन्स्टेलेसन ब्राण्डले वितरण गर्छ । उक्त कम्पनीले बियर उत्पादन बन्द गरेपछि अमेरिकामा कोरोना बियरको अभाव हुने प्रक्षेपण गरिएको छ ।
कम्पनीका अनुसार यो बर्षका पहिलो ३ महिनामा कोरोना बियरको व्यापार ८ दशमलव ९ प्रतिशतले बढेको थियो । मार्च महिनाको ३ हप्तामा भने गत बर्षको सोही अवधिको तुलनामा २४ प्रतिशतले बियरको विक्री बढेको थियो । कोरोनाभाईरसका कारण अमेरिकीहरुले बियरलगायतका पेयपदार्थहरु बढि लिन थालेका छन । यो बियरको चर्चा पछिल्लो समय आफ्नै नाम मिल्ने कोरोना भाइरसका कारण थप चर्चामा रहेको थियो ।
