काठमाडौं । सरकारले कोरोना भाइरसको संक्रमण समाप्तिपछि अर्थतन्त्रलाई चलायमान बनाउन विज्ञ समिति बनाएर अध्ययन गर्ने भएको छ ।
कोरानो पछि नेपालाको अर्थतन्त्र उकास्नका लागि विज्ञहरुको समिति गठन गर्न लागिएको अर्थ एवं सञ्चार तथा सूचना प्रविधि मन्त्री डा. युवराज खतिवडाले जानकारी दिए । उनका अनुसार योजना आयोगका उपाध्यक्षको अध्यक्षतामा प्राविधिक विज्ञ समेत संलग्न गरी अध्ययन समिति गठन गर्न लागिएको हो ।
उक्त छलफलमा आयोगका पूर्व उपाध्यक्षहरु डा. शंकर शर्मा, डा. जगदीशचन्द्र पोखरेल, डा. दिनेशचन्द्र देवकोटा, डा. स्वर्णीम वाग्ले र डा. मीन बहादुर श्रेष्ठ, स्वास्थ्य विज्ञ डा. अर्जुन कार्कीलगायतको सहभागिता थियो ।
छलफलका उनीहरुले सरकारले कोरोना संक्रमण नियन्त्रणका लागि थालेका प्रयासले गर्दा मुलुकलाई थप जोखिमबाट बचाउन सहज बनेको धारणा व्यक्त गरेका थिए ।
विज्ञहरुले स्वदेशमै रोजगारी सिर्जना गर्ने गरी कार्यक्रम ल्याउनुपर्ने, न्यून आय भएका र दैनिक ज्यालादारी गर्ने मानिसलाई खानपानको लागि समयमै राहत पुर्याउन ध्यान केन्द्रित गर्नुपर्ने बताएका थिए । साथै आगामी बजेटमा स्वास्थ्य, शिक्षा र कृषि क्षेत्रमा बढी जोड दिनुपर्ने, तथा खरिद तथा बिक्री पारदर्शी बनाउनु पर्ने लगायतका सुझाव दिएका थिए ।
छलफलमा मन्त्री खतिवडाले कोरोनाको संक्रमण रोकथाम सरकारको मात्र नभई सबैको साझा दायित्व भएको बताएका थिए । साथै यसका लागि सबै एकजुट भएर अघि बढ्नुपर्ने बताएका थिए ।
