काठमाडौं । हिमालय एयरलाइन्सले काठमाडौं–कतार उडान स्थगित गरेको छ । नेपालको निजी वायुसेवा कम्पनी हिमालय एयरलाइन्सले सोमबारदेखि लागू हुने गरी कतारमा निर्धारित सबै उडान रद्द गरेको जानकारी दिएको छ । अर्को सूचना जारी नभएसम्म हिमालयले काठमाडौंबाट कतारका लागि निर्धारित उडान फिर्ता गरेको हो ।
कतारले नेपालीसहित १४ मुलुकका नागरिकको प्रवेशमा अस्थायी प्रतिबन्ध लगाएसँगै हिमालय एयरलाइन्सले उडान स्थगित गरेको हो ।
एयरलाइन्सले ९ मार्चपछिका लागि लिएका सबै टिकट फिर्ता गर्न सकिने वा बिना कुनै अतिरिक्त शुल्क मिति परिवर्तन गर्न सकिने जानकारी दिएको छ । हिमालय एयरलाइन्सले चीनका उडान समेत स्थगित गरेको थियो ।
कतार प्रवेशमा रोक लगाए पनि कतारले ट्रान्जिटमा यात्रु भने रोकेको छैन । कतार हुदै यूरोप तथा अमेरिकी मुलुक जान भने ट्रान्जिटमा नेपालीलाई निषेध गरिएको छैन ।
