काठमाडौं । मेगा बैंक नेपालले गण्डकी विकास बैंकलाई प्राप्ति गर्ने प्रस्ताव पारित गरेको छ ।
बुधबार काठमाडौंमा भएको बैंकको विशेष साधारण सभामा सञ्चालक समितिका अध्यक्ष भोजबहादुर शाहले गण्डकी विकास बैंकलाई प्राप्ति गर्नका लागि प्रस्ताव गरेका थिए । सोही अनुसार साधरण सभाले प्रस्ताव पारित गरेको बैंकले जानकारी दिएको छ ।
मेगा बैंक र गण्डकी विकास बैंकको सेयर आदान प्रदान अनुपात १ः१ रहेको छ । यो प्राप्ति पछि बैंकको पुँजी, व्यवसायको आकारका साथै शाखा सञ्चालनमा वृद्धि भई ‘क’ वर्गको वाणिज्य बैंकको रुपमा स्थापित हुने बैंकका अध्यक्ष शाहले जानकारी दिएका छन ।
सभामा बोल्दै मेगा बैंक नेपालका प्रमुख कार्यकारी अधिकृत अनुपमा खुञ्जेलीले उत्कृष्ट व्यवसाय गरिरहेको गण्डकी विकास बैंकलाई प्राप्ति गरेपछि मेगा बैंकको स्तर अभैm बढ्ने बताईन । ग्राहकको विश्वास जित्दै प्रतिष्ठित ‘बैंक अफ दि एयर’ पुरस्कारबाटसमेत सम्मानित भएको स्मरण गर्दै उनले मेगा बैंकको शाखा सञ्जाल प्राप्ति पछि ५८ जिल्लामा फैलने बताईन ।
देशका २७ वटा ‘क’ वर्गका वाणिज्य बैंक मध्ये मेगा बैंक निक्षेपका आधारमा ११ औं स्थान, कर्जाका आधारमा १२ औं स्थान र मुनाफाका आधारमा ११ औं स्थानमा रहने सिइओ खुञ्जेलीले जानकारी दिएकी छिन ।
उनका अनुसार गण्डकीलाई प्राप्ति गरेपछि बैंकको चुक्ता पुँजी १३ अर्ब १३ करोड रुपैयाँ हुनेछ भने निक्षेप १ खर्ब २५ अर्ब रुपैयाँ भन्दा बढी र कर्जा १ खर्ब ९ अर्ब रुपैयाँ भन्दा बढी हुने भएको छ । त्यस्तै बैंकको शाखा संख्या २०६, एक्सटेन्शन काउन्टर ३०, एटीएम १४२ वटा हुनेछन् ।
त्यस्तै पोखरामा केन्द्रिय कार्यालय रहेको गण्डकी विकास बैंकको बुधबार सम्पन्न विशेष साधारण सभाले गण्डकीलाई मेगा बैंकले प्राप्ति गर्न स्वीकृति प्रदान गरेको छ । गण्डकी विकास बैंकका सञ्चालक समितिका अध्यक्ष शुशील गौचनले यस प्राप्तिका लागि पेश गरेका प्रस्तावलाई विशेष साधारणसभाले पारित गरेको हो । ९६ शाखा सञ्जाल रहेको गण्डकी विकास बैंकको चुक्ता पुँजी २ अर्ब ७५ करोड रुपैयाँ रहेको छ ।
दुबै बैंकको विशेष साधारण सभाले स्वीकृति दिएसँगै मेगा बैंकलाई गण्डकी विकास बैंक प्राप्ति गर्नका लागि बाटो खुलेको छ । यसै आर्थिक वर्ष भित्रमा गण्डकी विकास बैंकलाई प्राप्ति गरी संयुक्त कारोबार प्रारम्भ गर्ने गरी तयारी भइरहेको मेगा बैंकका अध्यक्ष शाहले जानकारी दिएका छन ।
