काठमाडौं । चालू आर्थिक बर्षको पहिलो ३ महिनामा सोधनान्तर घाटा बढेर ३५ अर्ब ४२ करोड रुपैयाँ पुगेको छ । गत आबको सोही अबधिमा शोधनान्तर खाता ४ अर्ब २७ करोड रुपैयाँले बचतमा रहेकोमा चालू आबमा निरन्तर ओरालो लागेको हो ।
पछिल्लो समय देशमा आयात उच्च र निर्यात एकदमै न्युन हुँदै गएपछि देशको शोधनान्तर बचतमा पनि असर पुर्याएको छ । देशमा भित्र्ने रेमिटान्स वृद्धिदर उच्च भएपनि शोधनान्तर घाटा चुलिँदै गएपछि त्यसले देशको समग्र अर्थतन्त्रलाई नै दबाबमा पारेको छ । चालू आबको असोजसम्ममा आयात ४३ शदमलव ६५ प्रतिशते वृद्धि हुँदा निर्यात १६ दशमलव १५ प्रतिशतले मात्र बढेको छ ।
यसैगरी समीक्षा अवधिमा चालु खाता घाटा विस्तार भई ८१ अर्ब ९६ करोड पुगेको छ । अघिल्लो वर्षको सोही अवधिमा यस्तो घाटा २५ अर्ब ५२ करोड रुपैयाँ मात्र रहेको थियो ।
चालू आबको पछिल्लो ३ महिनामा विदेशी विनिमय सञ्चिती सामान्य बढेपनि अमेरिकी डलको सञ्चितीमा भने गिरावट आएको छ । नेपाल राष्ट्र बैंकले सार्वजनिक गरेको तथ्याङ्क अनुसार चालू आबको ३ महिनामा विदेशी विनिमय सञ्चिति १ दशमलव ७ प्रतिशतले बढेर ११ खर्ब २ अर्ब ५९ करोडबाट बढेर ११ खर्ब २० अर्ब ९२ करोड पुगेको छ ।
तर, सो अबधिमा अमेरिकी डलरको सञ्चितीमा भने ५ दशमलव २ प्रतिशतले गिरावट आई ९ अर्ब ५६ करोड रुपैयाँमा झरेको छ । कुल विदेशी विनिमय सञ्चितिमध्ये नेपाल राष्ट्र बैंकमा ९ खर्ब ८९ अर्ब ६४ करोड रहेको छ भने बैंक तथा वित्तीय संस्थाहरूमा १ खर्ब ३१ अर्ब २८ करोड रुपैयाँ रहेको छ । सो अबधिमा भारतीय मुद्राको सञ्चितीमा २३ दशमलव २ प्रतिशत रहेको छ ।
