काठमाडौं । नेपाल राष्ट्र बैंकले बैंक तथा वित्तीय संस्थाहरुलाई दसैंका लागि आजबाटै नयाँ नोट दिन शुरु गरेको छ । बैंकहरुलाई उनीहरुले माग गरे अनुरुप नयाँ नोट उपलब्ध गराउन लागिएको नेपाल राष्ट्र बैंकका प्रवक्ता राजेन्द्र पण्डितले जानकारी दिए ।
राष्ट्र बैंकले सर्वसाधारणलाई भने १६ गतेबाट नयाँ नोट उपलब्ध गराउने भएको छ । तर, बैंकले आफ्ना ग्राहकहरुलाई वितरण गर्नका लागि भने आजैबाट दिन थालिएको हो । बैंक तथा वित्तीय संस्थाले भने भोलीबाटै नयाँ नोट वितरण गर्न शुरु गर्ने छन् ।
पण्डितका अनुसार बैंक तथा वित्तीय संस्थालाई आजबाट १४ गतेसम्म दिइने छ । यसैगरी सर्वसाधारणलाई भने १६ देखि २१ गतेसम्म वितरण गरिने छ । सर्वसाधारणलाई कुपन प्रणालीबाट नयाँ नोट वितरण गरिने भएको छ ।
राष्ट्र बैंकले यस पटक एक जनालाई ३७ हजार रुपैयाँ नयाँ नोट उपलब्ध गराउने छ । जसमा ५ रुपैयाँ देखि १ सय रुपैयाँसम्मका २÷२ बण्डलका दरले नयाँ नोट उपलब्ध गराउने छ । सो नोट राष्ट्र बैंकको थापाथलीबाट साट्न सकिने छ ।
